【名家專欄】【Kenneth Kwok】 數業人生: 談個人品牌

「個人」

管理學入面有一樣關於工作生存嘅法則,就係建立個人品牌。而點解要建立個人品牌嘅原因係因為現今社會嘅競爭越嚟越犀利,要大家認識你,了解你同接受你,首先就係要充分表現自己嘅能力。就算你識上天下海都無用,如果只係埋頭苦幹係咁做,而無人知道你嘅能力,其實好難去繼續發展自己既事業。當然以前係大公司入面做嘢已經深深咁感受到!

「品牌」

最近見到好多人都以個人名義去建立品牌,當然有好同唔好。因為如果所有嘢都係因為一個人先至可以成事嘅話,發展空間係其實相當有限,而當個人品牌變咗做產品嘅時候,其實可以做到幾多年?所以開頭靠個人品牌去建立係一件好事,但係如果業務開始擴大嘅話其實係需要轉型。只不過要將個人同公司完全脫勾係一件好難嘅事,所以好多時都同人講唔好搵我,搵我公司!

「慶幸」

如果要係公司建立個人品牌嘅話,其實最緊要嘅係唔好經常轉工,尤其係大公司!當然唔係叫你玩政治,因為通常會死得快啲。要穩打穩紮之餘仲要諗點樣可以做好啲!如果覺得唔啱嘅,其實可以提出解決方案,而且要堅持,因為改變大公司嘅政策同流程唔係一日半日嘅事。當然最緊要嘅唔好怕蝕底,仲要主動爭取機會。雖然離開咗大公司就嚟十年,慶幸嘅係仲有好多人記得我。

本文內容由作者 Kenneth Kwok 授權轉載,原文標題為:個人化,文章標題由 TechApple 編輯部修訂。以上言論屬於作者個人意見,並不代表 Techapple.com 立場。

作者簡介:郭嘉俊 Kenneth Kwok ,畢業於澳洲麥覺理大學工商管理碩士,近年專注數據分析行業推廣同發展。曾從事平面設計,網站開發,企業管理及商業諮詢等工作,於 2010 年創辦 Beehive Strategy (蜂策略),為亞太地區不同企業提供數據分析服務。公司網址:Beehive Strategy

 

發表迴響

你的電子郵件位址並不會被公開。 必要欄位標記為 *

限制時效已用盡。請重新載入驗證碼。